Վերջին տարիներին քաղցկեղի բուժման հարցում լավ արդյունքեր ենք գրանցում
«Առողջապահական համակարգը» կազմակերպել է յուրատեսակ ֆորում, որտեղ հյուրընկալված տարբեր բուժհաստատություններում աշխատող ուռուցքաբաններ իրենց կարծիքն են արտահայտել քաղցկեղային հիվանդությունների տարածվածության, բուժման, կանխարգելան եղանակների, ոլորտում առկա այլ խնդիրների շուրջ: Ընդհանրացնելով կարծիքները՝ կարելի է նշել, որ ախտորոշումը քաղցկեղի կանխարգելման լավագույն եղանակն է: Հայաստանում էլ կատարվում է արտերկրի չափորոշիչներին համապատասխան բուժում: Քաղցկեղը դատավճիռ չէ, եթե ժամանակին հայտնաբերվի և բուժվի: Զրուցում ենք ուռուցքաբան, ընդհանուր և կրծքային վիրաբույժ, բ.գ. թ Արմեն Քոչարյանի հետ:
-Պարոն Քոչարյան ուռուցքային հիվանդությունները համարվում են դարի չարիք: Որո՞նք են պատճառները, արդյոք կա՞ն տարբերակներ, որոնց շնորհիվ կարելի է խուսափել քաղցկեղից:
Ուռուցքային հիվանդությունները բավականին տարածված են ամբողջ աշխարհում: Հիվանդության առաջացման պատճառների մասին կարծիքները տարատեսակն են: Քաղցկեղը համարվում է բազմապատճառային հիվանդություն: Ժառանգական նախատրամադրվածություն, ռադիացիա, սնունդ, ինֆեկցիաներ, հորմոնալ դեղամիջոցներ, հակաբեղմնավորիչներ, …. Նորագոյացությունների առաջացման պատճառները շատ են, բոլորը բացառել հնարավոր չէ: Կանխարգելման միակ ճանապարհը վաղ հայտնաբերումն է: Ու կարող եմ ուրախությամբ արձանագրել, որ վերջին տարիներին բժշկին դիմելու կուլտուրան բավականին լավացել է: Տասը տարի առաջ մեզ դիմում էին հիմնականում բարձիթողի վիճակում՝ հիվանդության չորրոդ փուլում գտնվող հիվանդները, հիմա համեմատած շատացել են վաղ շրջանում դիմողները: Մարդկանց հետ տարվող աշխատանքների շնորհիվ, արդեն շատերն են նախընտրում դիմել բժշկի՝ առաջին իսկ նշանների դեպքում, որը շատ ավելի դյուրին է դարձնում բուժման ընթացքը և ավելացնում է լիարժեք բուժվողների թիվը:
-Շատ պացիենետներ վախենում են հետազոտվելուց, քանի որ այնքան էլ չեն վստահում ախտորոշման արդյունքներին: Ցավոք, շատ են դեպքերը, երբ տարբեր լաբորատորիաներում տարբեր արդյունքեր են հայտնաբերվում: Ինչ խորհուրդ կտաք պացիենտներին, ինչպես կողմնորոշվել, ում դիմել՝ ճշգրիտ պատասխանի համար:
Միանշանակ, բուժման ամենակարևոր էտապը ախտորոշումն է: Միայն ճշգրիտ ախտորոշման դեպքում կարելի է խոսել լիարժեք բուժման մասին: Մենք շատ ժամանակ ու միջոցներ ծախսում ենք հենց ախտորոշման վրա: Ուռուցքը շտապ վիրահատել չի կարելի: Այն պետք է լիարժեք, համբերատար հետազոտել: Ինչքան մանրամասն մինչև վիրահատությունը կատարվի հետազոտությունը ու վերլուծությունը, այնքան վիրահատությունից հետո վերականգնման ընթացքը դյուրին ու արդյունավետ կլինի: Որ լաբորատորիան ընտրել՝ ճշգրիտ հետազոտության համար, դժվար է ասել: Լաբորատորիաների թիվը տարեցտարի ավելանում է և պետք է ասել, առաջարկված ծառայությունների որակն էլ առողջ մրցակցության պայմաններում համապատասխանաբար բարելավվում է: Մենք, օրինակ, սերտորեն համագործակցում ենք «Հիստոջեն» հայ-գերմանական գիտագործնական կենտրոնի հետ: Ժամանակակից հետազոտության տեսակներ կան, որ կատարվում են միայն այդ կենտրոնում: Եթե չասենք, որ այն լավագույնն է, կարող ենք վստահաբար ասել, որ առաջատարներից է ախտորոշման ոլորտում: Չեմ վախենա ասել՝ նրանք հեղափոխություն են արել բժշկագիտության զարգացման մեջ՝ իմունոհիստոքիմիական լայն սպեկտորով արված հետազոտությունների շնորհիվ: Գերժամանակակից տեխնոլոգիան, որ օգտագործվում է բարձրակարգ, փորձառու մասնագետների կողմից թույլ է տալիս հասնել լավագույն արդյունքի: Կենտրոնը մեծ գործ է անում նաև այն առումով, որ իրականացնում է կոնֆերանսներ ու փորձի փոխանակման ծրագրեր գերմանացի գործընկերների հետ: Նրանք մշտապես ապացուցում են, որ տիրապետում են նորարարություններին, ինչի արդյունքում ունենում ենք քաղցկեղը հաղթահարած բազմաթիվ հիվանդներ:
-Աշխարհում քաղցկեղի դեմ պայքարի համար անընդհատ նոր լուծումներ են փնտրվում, նոր մեթոդներ գործածվում: Ի՞նչպիսին է վիճակը Հայաստանում:
Վերջին տարիներին լավ արդյունքեր ենք գրանցում: Քաղցկեղի բուժումը իրականցվում է մի խումբ բժիշկների անմիջական մասնակցությամբ: Ախտորոշումը իրականցնող բժիշկ, ճառագայթաբան, պաթոլոգ, ուռուցքաբան- վիրաբույժ, քիմիաթերապևտ՝ առնվազն այս հինգ մասնագետների մասնակցությամբ պետք է կատարվի բազմակողմանի հետազոտություն և ընտրվի համապատասխան բուժման եղանակ: Հայ բժիշկները այսօր բուժում նշանակելիս հիմնվում են միջազգային ուղեցույցների վրա, կախված քաղցկեղի տեսակից ընտրում բուժման ամենաօպտիմալ տարբերակը: Թիմի կողմից կատարված աշխատանքի դեպքում մենք ունենում ենք բավականին ընդգծված հաջողություններ:
-Հայաստանում վիճակը տարբերվում է նաև նրանով, որ հիվանդներից շատերը վճարողունակ չեն: Ֆինանսական խնդիրները շա՞տ են խանգարում բուժման ընթացքին:
Ուռուցքաբանության ոլորտի ամենաառաջնային խնդիրը ժամանակին դիմելիության ապահովումն է: Այդ հարցը ունի երկու երես, նախ մարդը պետք է գիտակցի բժշկի գնալու կարևորությունը, երկրորդը՝ դրամական միջոցներ ունենա հետազոտվելու համար: Եթե անգամ հետազոտությունը 20-30 հազար դրամ է, հայ ընտանիքի համար տարին երկու անգամ վճարելը բավականին դժվար է: Այս պարագայում անգնահատելի է ապահովագրական ընկերությունների դերը, որոնք նկատելի թեթևացնում են մեր քաղաքացիների հոգսը: Բժշկական ապահովագրական ընկերությունները պարտաճանաչորեն փոխհատուցում են և ախտորոշման, և բուժման, և անգամ վիրահատությունների համար:
