Գինեկոլոգիան` կնոջ հայելի. խորհուրդներ կանանց՝ մասնագետից

Գինեկոլոգիան կնոջ հայելին է, իսկ գինեկոլոգն այն մարդն է, ով կնոջ կյանքի մասին գրեթե ամեն ինչ: Շատ կարևոր է, որ կինն ընտրի կոնկրետ մեկ մասնագետի ու նրան վերաբերի որպես ընտանեկան բժիշկ.«Երբ որ դու կնոջը ճանաչում ես ամբողջ կյանքի ընթացքում՝ սկսած դեռահասության շրջանից մինչև կլիմակտերիկ ընթացք,  դու իրեն կարող ես ավելի ճիշտ ուղղություն ցույց տալ, քանի որ դու գիտես կոնկրետ իր օրգանիզմի սպեցիֆիկան”,-ասում է մանկաբարձ-գինեկոլոգ Լիլիթ Հակոբջանյանը:

Բժշկուհի Հակոբջանյանը այն մասնագետներից է Հայաստանում, ում պացիենտները տարիքային սահմանափակում չունեն: Ըստ նրա՝ եթե մինչև 11-12 տարեկանը աղջիկների մայրիկները կարող են դիմել պոլիկլինիկա՝ մանկաբույժի խորհրդատվություն ստանալու, ապա արդեն դեռահասության շրջանում անհրաժեշտ է դիմել  գինեկոլոգի, որպեսզի համոզվեն, որ երեխայի մոտ զարգացումը ընթանում է՝ ըստ նորմայի, չկան հորմոնալ խանգարումներ: Ըստ նրա՝ դեռահասների պարագայում ամենաշատ հանդիպող խնդիրներից են  մաշկային խնդիրները, մազակալումը, ճարպակալումը:

Իսկ կնոջը համար ուղղակի անհրաժեշտություն է դիմել գինեկոլոգի, եթե ունի արտադրություն սեռական օրգաններից, ցավ, դաշտանային ցիկլի խանգարումներ, 1 տարի առանց պաշտպանվելու սեռական կյանքով ապրելու դեպքում հղիության բացակայություն, ճարպակալում: Այս նախանշանները կարող են հուշել ամենատարբեր առողջական խնդիրների մասին, որոնց մասին կարելի է եզրակացություն անել միայն անամնեզ հավաքելուց հետո. «Անամնեստիկ տվյալները մեզ ուղղորդում են, թե ինչ հետազոտություններ են անհրաժեշտ պացիենտին: Գինեկոլոգիական խնդիրների դեպքում կանայք հաճախ ունենում են ժառանգական նախատրամադրվածություն: Եթե կնոջ մայրը, մորաքույրը կամ տատն ունեցել են պոլիպներ, միոմաներ, կրծքագեղձում նորագոյացություններ կամ ուռուցքներ, ապա դա ազդակ է, որ կինը շատ ուշադիր լինի իր առողջությանը՝ այդ հիվանդություններից խուսափելու համար»,- շեշտում է նաև՝ հավելելով, որ իրենց հետազոտությունների ընթացքում նաև բազում այլ հիվանդություններ են բացահայտում` վահանաձև գեղձի հիվանդություն, վարիկոզ լայնացում, մաշկի հետ կապված խնդիրներ, ու ըստ անհրաժեշտության ուղղորդում նաև այլ նեղ մասնագետների մոտ:

Ի դեպ, կնոջ օրգանիզմի ընթացիկ վիճակն գնահատելու համար բժշկուհի Հակոբջանյանը ինքն է կատարում սոնոգրաֆիկ հետազոտությունները՝ հատուկ վերապատրաստում անցնելուց հետո, ինչն իրեն օգնում է ավելի համապարփակ հասկանալ կնոջը առողջական խնդիրների պատճառները: Բուժման ընթացքում միշտ նախընտրում է կոնսերվատիվ տարբերակները, եթե իհարկե խնդիրն այնքան բարդացած չէ, երբ չկա այլ տարբերակ, քան վիրաբուժական միջամտության դիմելը: Իրականացնում է գինեկոլոգիական վիրահատությունների ողջ ծավալը թե բաց ու թե լապարասկոպիկ տարբերակներով:

Անպտղությունը ոչ թե միայն կնոջ, այլ ամուսնական զույգի  խնդիրն է

Երբ բանը հասնում է հղիությանը, այստեղ Լիլիթ Հակոբջանյանը խորհուրդ է տալիս շատ լուրջ վերաբերել հղիության ողջ պրոցեսին, ու առհասարակ խուսափել հղիության արհեստական ընդհատումներից, քանի որ դրանք շատ լուրջ տրավմա ու սթրես են կնոջ օրգանիզմի համար. “Շատ կարևոր է, որ երեխան սպասված ու ցանկալի լինի ծնողների համար: Ես կտրականապես դեմ եմ նաև սեռով պայմանավորված հղիության ընդհատմանը: Երեխան Աստծո պարգևն է, ու կինը պետք է գիտակցի նրանից ազատվելու հետագա թե հոգեբանական հետևանքները և թե հնարավոր բացասական ազդեցությունը իր օրգանիզմի վրա:

Լիլիթ Հակոբջանյանի գործունեության կարևոր ուղղություններից է նաև անպտղության բուժումը, որի հիմնական պատճառներից են բորբոքումները,  հորմոնալ խնդիրները, ընտանիք կազմելուց առաջ չհետազոտվելը, թաքցված հիվանդությունները.«Կա բացարձակ և հարաբերական անպտղություն:  Բացարձակի պարագայում իհարկե հղիությունը բացառվում է, քանի որ դա ենթադրում է, որ կինը ունի օրգան համակարգերի՝ արգանդ, ձվարաններ… բացակայություն կամ թերզարգացվածություն: Իսկ ինչ վերաբերում է հարաբերական անպտղությանը, ապա այստեղ գրեթե չկան դեպքեր, որոնք հաղթահարել հնարավոր չէ, ուղղակի կան անպտղության տարբեր տեսակներ, որոնք բուժման տարբեր ռազմավարություն են պահանջում: Եթե ուղղակի բուժումը չի օգնում, ապա որպես լուծում ընտրվում է արհեստական բեղմնավորման տարբերակը, հետևաբար այս դեպքն էլ անպտղություն չեմ համարում: Կա լուծում»,-նկատեց գինեկոլոգը:

Անպտղության խնդրի լուծման ճանապարհին բժշկուհին շատ կարևոր է համարում աշխատանքը զույգի հետ, և կինը և տղամարդը պետք է ներգրաված լինեն բուժման պրոցեսում:

Բժշկուհին կարծում է՝ պետք է օգնել զույգին չմեղադրել իրար, դրդել, որ նրանք անկեղծ պատմեն իրենց առողջական խնդիրների մասին՝առանց որևէ բան կոծկելու ու վստահեն բժշկին, հավատան արդյունքին: Նա  ուրախալի է համարում այն հանգամանքը, որ ավելի շատ թվով զույգեր են սկսել բուժման համար համատեղ դիմել. “Ուրոլոգների ու սեքսապաթոլոգների հետ սերտ աշխատանքի արդյունքում կարողանում ենք մեզ դիմող ընտանիքներին երեխա պարգևել է: Նոր ծնվող երեխան ուժ է ամեն օրվա համար, նրա ծնունդը  «մաքրում է» կուտակված բացասական լիցքերը»,- մասնագիտական ամենամեծ նվաճման՝ կյանք ստեղծելու բանաձևը այսպես է ներկայացնում մանկաբարձ –գինեկոլոգ Լիլիթ Հակոբջանյանը:

Շուրջ 11 տարվա ընթացքում շատ ընտանիքների բարեկամը դարձած  բժշկուհին իր աշխատաժամերից դուրս էլ բժկուհին միշտ հասանելի է ացելուների համար:

Ճիշտ է գերծանրաբեռնված աշխատանքային գրաֆիկի պատճառով ավելի քիչ ժամանակ է մնում իր ընտանիքի, գիտական աշխատանքների համար, այդ պատճառով ստիպված է եղել նաև դադարեցնել դասավանդումը Երևանի պետակական բժշակական համալսարանում, սակայն ուժ են տալիս բուժված պացիենտների մեծ քանակն ու շնորհակալական խոսքերը, որոնք ստիպում են նոր եռանդով աշխատել:

Ի վերջո դեռ մանկուց որոշել էր՝ մարդկանց բուժելն իր առաքելությունն է: 2005թ-ին ուսումը ավարտել է Երևանի պետական բժշկական համալսարանում, ապա մեկնել Մոսկվա ու սովորել է Ի. Մ. Սեչենովի անվան պետական ակադեմիայի մանկաբարձության և գինեկոլոգիայի բաժնում: 2007թ.-ին էլ սովորել է Ռուսաստանի ռենտգենոլոգիայի և ռադիոլոգիայի գիտական կենտրոնում՝ ստանալով ուլտրաձայնային ախտորոշման մասնագետի որակավորում: Նույն թվականին սովորել է նաև Մոսկվայի պետական բժշկաստոմատոլոգիական համալսարանում «Լազերոլոգիան մանկաբարձության և մանկաբարձության բնագավառում» մասնագիտացմամբ: 2008 թվ-ից աշխատել է «Շենգավիթ» բժշկական կենտրոնում, 2011 թվ-ից աշխատել է նաև թիվ 4 պոլիկլինիակում: Այժմ էլ «Նաիրի»  և «Ցիտոմեդ» բժշկական կենտրոնների հիվանդասենյակների առջև են բժշկուհուն սպասում այցելուները, ում միշտ ընդունում է ժպիտով ու ճանապարհում՝ տալով վստահություն, որ բուժումը հասնելու է նպատակակետին: