Քիթ-կոկորդ-ականջ. վիրաբույժի ասելիքը 30 տարվա փորձով

Քթի պլաստիկ վիրահատությունները Հայաստանում լայն թափ ստացան 1980-ական թվականներից, և այժմ տարեկան կատարվում է շուրջ 4-4.5 հազար քթի պլաստիկ վիրահատություն:

Մեծացել է դիմելիությունը, փոխվել են պահանջները, մեծացել է կատարվող պլաստիկ վիրահատությունների ցանկը, ներդրվում են նորագույն ժամանակակից տեխնոլոգիաներ:

Որո՞նք են այսօր դեմքի շրջանում ամենապահանջված պլաստիկ վիրահատությունները և ովքե՞ր ենավելի հաճախ դիմում, ի՞նչ խնդիրներ են զուգահեռվում վիրահատությունների ժամանակ, և թե որո՞նք են քիթ-կոկորդ-ականջ եռամիասնության շրջանում ամենատարածված հիվադությունները՝ պատմում էքիթ-կոկորդ-ականջաբան, պլաստիկ վիրաբույժ Էդուարդ Գեորգիի Դանիելյանը:

- Պարո՛ն Դանիելյան, նախ հետաքրքիր է, թե ինչ փորձառությամբ եք աշխատում այս բնագավառում. ի՞նչ բժշկական ուղի եք հաղթահարել  և ո՞րն եք համարում Ձեր  հաջողության գրավականը:

- Ավարտել եմ Երևանի պետական բժշկական համալսարանը, այնուհետև որպես քիթ-կոկորդ-ականջաբան, պլաստիկ վիրաբույժ վերապատրաստվել Թբիլիսիում, Մոսկվայում, Կազանում, Սանկտ Պետերբուրգում, Երևանում: Ուսանողական տարիներին որոշել էի ընտրել գինեկոլոգի մասնագիտությունը, բայց կյանքն այնպես դասավորվեց, որ ընտրեցի քիթ-կոկորդ-ականջաբանի մասնագիտությունը (հավանական է՝ նախախնամության գործոնն իր դերն ունեցել է): Այժմ, երբ արդեն տիրապետում եմ իմ մասնագիտությանը, 29 տարվա փորձը վկայում է, որ կատարել եմ մասնագիտական ճիշտ ընտրություն: Աշխատանքայն գործունեության ժամանակ եղել են դժվարություններ, որոշ արգելքների հաղթահարում, հետվիրահատական բարդություններ, բարդ իրավիճակներ, որոնց հաղթահարումը բերել է կամային հատկանիշների և մասնագիտական պրոֆեսիոնալիզմի: Իմ հաջողության գրավականն են մասնագիտական ունակությունները, բժիշկ-հիվանդ փոխհարաբերությունները, ազնվությունը, գործին նվիրվածությունը:

- Պարո՛ն Դանիելյան, ի՞նչ վիրահատություններ եք Դուք կատարում, որքա՞ն մատչելի և հասանելի ենդրանք, և արդո՞ք սովորաբար արդարանում են այցելուների սպասելիքները:

- Կատարում եմ քիթ-կոկորդ-ականջ մասնագիտությամբ բոլոր վիրահատությունները և մանիպուլացիաները: Պլաստիկ վիրահատություններից նախընտրում եմ քթի, ականջախեցու և կոպերի պլաստիկ վիրահատությունները: Ամենատարածվածն իհարկե քթի պլաստիկ վիրահատություններն են:  Առհասարակ մինչև վերջին տարիները դիմում էին հիմնականում  աղջիկները, սակայն տղաների՝ վերջին տարիների դիմելիությունը նկատելիորեն ավելացել է: Եթե կանգ առնենք քթի պլաստիկ վիրահատությունների վրա, ապա պետք է նշել, որ այդ վիրահատությունը կատարվում է ոչ միայն արտաքին ձևը փոխելու, այլ հիմնականում քթի շնչառական ֆունկցիայի վերականգնման նպատակով (քթի միջնապատի թեքվածության ուղղում, քթի ստորին խեցիների չափերի փոքրացում): Այդ պատճառով այն կարծիքին եմ, որ հատկապես քթի պլաստիկ վիրահատությունը կատարվի քիթ-կոկորդ-ականջաբանի կողմից և այն պլաստիկ վիրաբույժների, որոնք տիրապետում են քթի ներքին ստրուկտուրաների հետ աշխատելու հմտությանը:

Մեր կլինիկայում քթի հետ կապված վիրահատությունները կատարվում են ընդհանուր անզգայացման տակ: Վիրահատված անձը կլինիկայում գտնվում է երկու օր, օգտագործվում են նորագույն միջոցներ և ֆիքսող կապեր, որոնց հեռացումից հետո նա երկու շաբաթ գտնվում է իմ հսկողության տակ: Բարդություններից խուսափելու համար ականջախեցու պլաստիկ վիրահատությունները հիմնականում կատարվում են տեղային անզգայացման պայմաններում, պացիենտը 8-10 օր գտնվում է բժշկի հսկողության տակ:

Կոպերի պլաստիկ վիրահատությունները կատարվում են տեղային անզգայացման տակ: Դիմում են միայն կանայք: Վիրահատությունն արվում է երիտասարդացման, էսթետիկայի ապահովման նպատակով:

Յուրաքանչյուր վիրահատող բժիշկ վիահատության ընթացքում ակնկալում է լավագույն արդյունքներ, առանց բարդությունների ընթացք: Սակայն հազվադեպ կարող են լինել հետվիրահատական մասնակի խնդիրներ, որոնք պահանջում են կրկնակի վիրահատություն, որն ավելի մեծ պատասխանատվություն է պահանջում: Շատ կարևոր է վիրահատվող անձի հոգեբանական վիճակը, նրա կողմից միջամտության արդյունքների սպասումները: Լինում են դեպքեր, երբ այցելուները վիրահատվելու մեծ ցանկության պատճառով թաքցնում են որոշ հիվանդություններ, որոնք կարող են լուրջ խնդիրներ առաջացնել վիրահատող բժշկի համար, այդ պատճառով անհրաժեշտ է բազմակողմանի հետազոտություն:

- Ձեր կարծիքով, ճի՞շտ է արդյոք կատարել պլաստիկ վիրահատություն, փոխել այն, ինչը տրված է իծնե:

- Այդ հարցին պատասխանեմ ոչ որպես վիրաբույժ: Այսքան տարիների շփումը ցույց է տվել, որ որոշ դեպքերում մարդու արտաքինը կարևոր նշանակություն ունի անձի կայացման, ինքնահաստատման, որոշակի կոմպլեքսներից ձերբազատվելու պարագայում:

- Որո՞նք են քիթ-կոկորդ-ականջի ամենատարածված հիվանդությունները:

- Քթի հիվանդություններից հիմնականում դիմում են քթի սուր և քրոնիկ հարբուխների, քթի հարակից խոռոչների բորբոքումների, քթային արնահոսությունների, շնչառության դժվարացման, վիրուսային կամ ալերգիկ հիվանդությունների, որոշ բարորակ գոյացությունների կապակցությամբ:

Ականջի հիվանդություններից դիմում են սուր և քրոնիկ բորբոքումների, լսողության իջեցման, ականջներում աղմուկի առկայության, արտաքին լսողական անցուղու բորբոքումների կապակցությամբ: Բուժումն արդյունավետ չի կարող լինել, եթե այն տարվի միակողմանի: Պետք է վերացնել քրոնիկ ինֆեկցիոն օջախները, ապահովել ազատ շնչառությունը, բարձրացնել օրգանիզմի դիմադրողականությունը:

Ես՝ որպես պլաստիկ բժիշկ, մանիպուլատիվ բուժումների կողմնակից եմ, այսինքն՝ չպետք է բավարարվել միայն դեղորայք նշանակելով, այլ բուժման ամբողջ ընթացքն ապահովել կոմպլեքս պրոցեդուրաներով: Այդ ժամանակ բարդություններն արագ կանխվում են, բուժման էֆեկտիվությունը բարձրանում է:

Որպես բժիշկ՝ առաջին հերթին մեր ժողովրդին ցանկանում եմ առողջություն, իսկ հիվանդության դեպքում դիմել բժշկի և ստանալ մասնագիտական խորհրդատվություն և օգնություն: