Օրթոպեդիայում հաճախ հանդիպող խնդիրներ. Արտակ Գալստյան

Արտակ Սամվելի Գալստյանի գործունեության հիմնական ուղղությունը օրթոպեդիան է, մասնավորապես խոշոր հոդերի էնդոպրոթեզավորում, էնդոսկոպիկ վիրաբուժություն, արթրոսկոպիա, ոտնաթաթի մատների, դաստակի դեֆորմացիաների շտկում, սովորույթային հոդախախտի բուժում: Բժիշկը զբաղվում է նաև կոտրվածքների կոնսերվատիվ և վիրահատական բուժմամբ:   

Բժշկի հետ խոսել ենք օրթոպեդիայում առավել հաճախ հանդիպող խնդիրների մասին:

Օրթոպեդիայում ամենահաճախ հանդիպող հիվանդություններն են դեֆորմացնող օսթեոարթոզը և վնասվածքային արթրոզները։ Դեֆորմացնող օսթեոարթրոզների ժամանակ տեղի են ունենում հոդաճառի դեգեներացիա և ենթաճառային ոսկրի կառուցվածքային փոփոխություններ: Դրանք հատուկ են բարձր տարիքային խմբի պացիենտներին: Իսկ վնասվածքային արթրոզները հիմնականում հոդերի շրջանում առաջացած հետվնասվածքային բարդություններ են և հատուկ են երիտասարդներին, ովքեր վարում են ակտիվ կենսակերպ, զբաղվում սպորտով:

Բժիշկ Արտակ Գալստյանի պացիենտների շրջանում բավական մեծ թիվ են կազմում կոնքազդրային հոդի բնածին դիսպլազիաներ ունեցողները: Դրանք հիմնականում երիտասարդներ են, որոնց մոտ հիվանդությունը չի ախտորոշվել ու բուժվել ժամանակին: Բնածին դիսպլազիաների դեպքում հիվանդության ախտանշաններն ավելի վաղ են սկսում: 45-50 տարեկանում սկսվում է կոնքազդրային հոդի դեկոմպենսացիա, հիվանդն այլևս չի կարողանում քայլել:

·   Հայաստանում վերջին տարիներին սկսել են իրականացնել նորածինների կոնքազդրային հոդի սքրինինգ: Դա հնարավորություն է տալիս ավելի վաղ ախտորոշել հիվանդությունը, նորածնային տարիքում հայտնաբերել բնածին դիսպլազիան, կանխարգելել դրա զարգացումը։