Անպտղության խնդիրների պատճառների վերացում լապարասկոպիկ մեթոդով <<Արթմեդ>> բժշկական կենտրոնում

Տարին մեկ անգամ յուրաքանչյուր կին պարտադիր պետք է այցելի գինեկոլոգի, անցնի սոնոգրաֆիկ հետազոտություն, հանձնի համապատասխան հետազոտություններ, համոզված և ապահով լինելու համար, որ առողջ է:

 «Արթմեդ» բժշկական կենտրոնի գինեկոլոգիական ծառայության փորձառու բժիշկները իրականացնում են գինեկոլոգիական բոլոր հիվանդությունների վիրահատական և կոնսերվատիվ բուժում: Այստեղ ստեղծված են բոլոր պայմանները հիվանդների լիարժեք բուժման, նրանց կյանքի որակը բարձրացնելու համար:

Գինեկոլոգ Սարգիս Ասլանյանի հետ զրուցել ենք բժշկական կենտրոնում  լապարասկոպիկ եղանակով կատարվող վիրահատական միջամտությունների մասին:

Ցանկացած հիվանդության դեպքում ամենակարևոր և առաջնային խնդիրը պացիենտի հիվանդության ճիշտ ախտորոշումն է: Վերջինիս համար լավագույն և ժամանակակից մեթոդներից մեկը դիագնոստիկ լապարասկոպիան է: Շատ հաճախ այն, ինչը հնարավոր չէ տեսնել սոնոգրաֆիկ եղանակով, նույնիսկ ԿՏ և ՄՌՏ հետազոտության միջոցով, հնարավոր է ախտորոշել լապարասկոպիկ հետազոտության միջոցով: Իսկ դրանից հետո շատ ավելի հեշտ է նույն մեթոդով կատարել նաև բուն վիրահատությունը:

Լապարասկոպիկ եղանակով «Արթմեդ» բժշկական կենտրոնում իրականացվում են  ձվարանների, արգանդափողերի, միոմաների, արգանդի հեռացումներ, անպտղությունների ժամանակ կպումների անջատումներ, էնդոմետրոիդ օջախների հեռացումներ, այրումներ:

Այսօր ամուսնական զույգերի թիվ մեկ խնդիրը անպտղությունն ու դրա առաջացրած հետևանքներն են: Անպտուղ համարվում է այն ամուսնությունը, երբ այս կամ այն պատճառով, առանց որևէ հակաբեղմնավորիչների մեկ տարվա ընթացքում կանոնավոր սեռական կյանքով ապրելու դեպքում հղիություն չի առաջանում։

Այս դեպքում ամենակարևոր և առաջնային քայլը, որ պետք է անեն զույգերը, փորձառու և վերապատրաստված մասնագետին դիմելն է:

Գինեկոլոգ Սարգիս Ասլանյանն ասում է, որ հորմոնալ խնդիրների կողքին կանանց մոտ տարածված խնդիր է նաև ձվազատման բացակայությունը:  Կնոջ օրգանիզմում ամեն ամիս հասունանում են ֆոլեկուլներ, որոնցի մեկը ցիկլի համապատասխան օրը պետք է ձվազատվի: Եթե այս գործընթացը կնոջ օրգանիզմում չի կատարվում մի քանի ամիս, ապա այդ ֆոլեկուլները մեծանալով վերածվում են կիստաների: Իսկ ձվազատման բացակայության  պատճառը, ըստ մեր զրուցակցի, կարող են լինել հորմոնալ խնդիրներն ու ձվարանի կեղևի հաստությունը: <<Դրա համար նախ իրականացնում ենք հորմոնալ հետազոտություն: Եթե ի հայտ եկան շեղումներ, նշանակում ենք դեղորայքային բուժում: Բայց եթե կնոջ մոտ նորից ձվազատում չի լինում, ապա լապարասկոպիկ մեթոդով կատարում ենք ձվարանի կեղևի կտրվածք: Այն հնարավորություն է տալիս, որպեսզի հետագա ամիսներին կինը ունենա ձվազատում, հետևաբար լինի նաև հղիություն>>, ասում է գինեկոլոգը:

Որպես անպտղության որոշման պատճառ շատ հաճախ իրականացվում է նաև հիստերոսալպինոգրաֆիա՝ արգանդափողերի անցանելիության ստուգում: <<Արթմեդ>> բժշկական կենտորոնում էնդոսկոպիկ եղանակով բժիշկը ռենտգենյան սարքի  կիրառմամբ հատուկ կաթետրով պարանոցային խողովակով արգանդի խոռոչի մեջ է ներարկում հակադրիչ նյութ: Կպումների բացակայության դեպքում հեղուկը արգանդափողերով արգանդի խոռոչից սահուն հոսում է դեպի որովայնի խոռոչ: Սարգիս Ասլանյանն հավաստիացնում է, որ այս միջամտությունը ցավոտ չէ, և կինը դրանից հետո կարող է վերադառնալ իր առօրյային: Բայց եթե հակադրիչ նյութը չի անցնում փողերով, նշանակում է առկա են փակ արգանդափողեր: Այդ դեպքում նախ պարզում են պատճառը, որը կարող է լինել ինչպես փողային, այնպես էլ շուրջփողային խնդիրների արդյունքում: Պետք է նաև վերացնել այն, ապա անցնել լապարասկոպիկ եղանակով արգանդափողերի անանցանելիության բացմանը, որից հետո կինը կրկին մնալով բժշկի հսկողության տակ, կարող է պլանավորել հղիությունը:

<<Արթմեդ>> բժշկական կենտրոնի գինեկոլոգները լապարասկոպիկ եղանակով  էնդոմետրոիդ կիստաներ հեռացնելու մեծ փորձ ունեն: Վերջերս նրանք նույնիսկ 12 սմ չափի էնդոմետրոիդ կիստայի հեռացում են իրականացրել: Կիստան եթե տեղակայվում է արգանդի պատի հաստության մեջ, առաջացնում է ադենոմիոզ հիվանդությունը, եթե տեղակայվում է ձվարանի մեջ, առաջացնում է էնդոմետրոզ կիստա, եթե հայտնվում է որովայնի խոռոչում՝ առաջացնում է կոնքի խոռոչի կիստա: Այն սաստիկ ցավեր է առաջացնում՝ մեծապես ազդելով կնոջ կյանքի որակի վրա: Այս դեպքում բժշկական կենտրոնի  մասնագետները  լապարասկոպիկ եղանակով կատարում են կիստայի հեռացում՝ ըստ տեղակայման: Միջամտությունը քիչ ինվազիվ է, որից հետո կինը ստանում է համապատասխան դեղորայքային բուժում, հետո որոշ ժամանակ մնում է  բժշկի հսկողության տակ, և արդեն կարող է պլանավորել հղիությունը:

Սեռական ակտի ցավոտ լինելը, արտադրությունը, հատկապես եթե այն ուղեկցվում է տհաճ հոտով, լուրջ ցուցում է բժշկի դիմելու համար, ասում է գինեկոլոգ Սարգիս Ասլանյանը.  <<Հնարավոր է օրգանիզմում տեղի են ունենում բորբոքային պրոցեսներ, որի հետևանքով կոնքի խոռոչում առաջանում են կպումներ: Այս տեսակ կպումները վտանգավոր են հատկապես վերարտադրողական շրջանում գտնվող կանանց համար, որովհետև կարող են հանգեցնել անպտղության: Այս դեպում ևս Արթմեդ բժշկական կենտորոնում լապարասկոպիկ եղանակով կատարում ենք կպումների անջատում >>:

Տարիներ առաջ, եթե կնոջ մոտ ախտորոշվում էր  միոմա, ապա խնդիրը լուծվում էր արգանդի հեռացմամբ: Ժամանակակից բժշկության նոր մեթոդները  շատ բան փոխեցին. այսօր միոմաների հեռացումը կախված է նրանից, թե դրանք որտեղ են տեղակայված:  Եթե դրանք գտնվում են արգանդի պատի հաստության մեջ և չափերով փոքր են, գուցե կարիք չլինի դրանք հեռացնել, պետք է անհատապես դիտարկել յուրաքանչյուր դեպքը: Առավել ռիսկային և վտանգավոր են արգանդի լորձաթաղանթի տակ գտնվող միոմաները, որոնք կարող են պատճառ դառնալ ուժգին արյունահոսության: Ճիշտ է, միոմաները չարորակ չեն, բայց կարող են դրանք կնոջ կյանքի որակի վրա կարող են մեծ ազդեցություն ունենալ ու վերածվել  ուռուցքի:  <<Արթմեդ>> բժշկական կենտրոնում միոմայի հեռացման որոշումը կատարվում է հաշվի առնելով կնոջ տարիքը (վերարտադրողական տարիքում է , թե ոչ), չափերով մեծ է, թե ոչ, խանգարում է կնոջ կյանքին, թե ոչ:

Դրա համար, գինեկոլոգ Սարգիս Ասլանյանը խորհուրդ  է տալիս ցանկացած դեպքում որոշումը կայացնել բուժող բժշկի հետ  մանրամասն քննարկումից հետո:

Այսօր ցանկացած խնդիր, հիվանդություն հնարավոր է բուժել, եթե դիմեք համապատասխան մասնագետի հիվանդության վաղ փուլում: Սարգիս Ասլանյանը  հավաստիացնում է՝ բուժման մեթոդներն այնպիսի զարգացում են ապրել, որ կարող ենք միասին հաղթահարել նույնիսկ ամենաբարդ հիվանդությունները: