Արամյանց ԲԿ-ն համալրվել է գերժամանակակից համակարգչային տոմոգրաֆիայի սարքավորմամբ

 Ժամանակակից բժշկության մեջ համակարգչային տոմոգրաֆիան հանդիսանում է մի շարք հիվանդությունների ախտորոշման հիմնական մեթոդներից մեկը: Այն հնարավորություն է տալիս րոպեների ընթացքում ստանալ ամբողջական ինֆորմացիա օրգան-համակարգերի  պատկերի մասին, ինչպես նաև տարբերակել օրգանների անատոմիական եւ մորֆոլոգիական փոփոխությունները: Այն արդյունավետ մեթոդ է գլխուղեղի, թոքերի, ողնաշարի, ողնուղեղի, լյարդի, երիկամների, մակերիկամների, ենթաստամոքսային գեղձի, միզուղիների,  շագանակագեղձի, արգանդի, աորտայի, թոքային զարկերակի, ստորին և վերին վերջույթների հիվանդությունների ախտորոշման համար:

Վերջերս Արամյանց բժշկական կենտրոնում ևս ներդրվել է համակարգչային տոմոգրաֆիայի Siemens ընկերության գերժամանակակից SOMATOM GO UP 2021 սարքավորումը: Այն հնարավորություն է տալիս արագ, անվտանգ և ճշգրտորեն ինֆորմացիա ստանալ հետազոտվող օրգանի մասին, իսկ ծառայության ղեկավարն է մի քանի տասնյակ տարիների փորձառություն ունեցող, հեղինակավոր մասնագետ,  ճառագայթաբան Արտաշես Հարությունյանի հետ:

Եթե հիվանդության ախտորոշման ժամանակ ռենտգեն կամ սոնոգրաֆիկ հետազոտություններից ստացված տվյալները բժշկին ամբողջական ինֆորմացիա չեն տալիս  տվյալ հիվանդության մասին, ապա բժշկի ցուցումով կատարվում է համակարգչային տոմոգրաֆիա, ասում է Համակարգչային տոմոգրաֆիայի ծառայության մասնագետ, Ճառագայթաբան Արտաշես Հարությունյանը: Հետազոտության ժամանակ հիվանդը պառկում է հատուկ սեղանին, որի շարժվելու ընթացքում տեղի է ունենում հետազոտվող հատվածի սքանավորում:  Շերտ առ շերտ ստացված պատկերները ձևափոխվելով թվային տվյալների վերարտադրվում են  էկրանի վրա: Արամյանց բժշկական կենտրոնում ներդրված SOMATOM GO UP 2021 ԿՏ սարքավորումը պատկերի գերազանց որակը պահպանում է նույնիսկ ճառագայթման ամենացածր չափաբաժինների դեպքում: Զգայուն օրգանները հուսալիորեն պաշտպանվում են սքանավորման ժամանակ: Պատկերները ստացվում են չափազանց պարզ, ախտորոշելով օնկոպաթոլոգիաները նույնիսկ ամենավաղ փուլերում: Այս սարքը թույլ է տալիս մեկ ճառագայթման միջոցով հազարապատիկ ավել ինֆորմացիա ստանալ հետազոտվող օրգանի մասին: Սարքավորման առավելություններից է նաև մինչև 250 կգ քաշ ունեցող հիվանդներին հետազոտելու հնարավորությունը:

Համակարգչային շերտագրման ժամանակ երբեմն որոշ հիվանդություններ ախտորոշելու համար անհրաժեշտ է լինում կիրառել ներերակային կոնտրաստ նյութ: Վերջինիս կիրառումը հետազոտությունը դարձնում է առավել ինֆորմատիվ, հնարավորություն տալով նույնիսկ ախտորոշել բարորակ և չարորակ գոյացությունները, ասում է մեր զրուցակիցը. <<Կոնտրաստը հատուկ նյութ է, որը երակով՝ արյան միջոցով  տարածվում է օրգան համակարգերի մեջ՝ հնարավորություն տալով տեսնել այն օրգանը, որը ախտահարված է:  Քանի որ ախտահարված օրգանը անմիջապես կլանում է կոնտրաստը, դրանով կարողանում ենք տարբերակել բարորակ ուռուցքը չարորակից: Բացի դա, տեսնում ենք արյան մատակարարումը  կոնկրետ օջախ, և դրանով օգնում վիրաբույժին  վիրահատության ժամանակ տեսնելու անոթները>>:

Արամյանց բժշկական կենտրոնում շուտով նաև կներդրվի պետ պատվերի համակարգը, որը թույլ կտա բնակչությանը քաղաքի կենտրոնում, լավագույն բժշկական հաստատությունում անցնել ԿՏ հետազոտությունը անվճար: