Վիրաբույժի դիմակը միայն դիմագծերը չի թաքցնում: Նրա բոլոր տագնապներն ու հույզերը մնում են այդ դիմակի տակ: Միայն ճակատի հոսող քրտինքն ու մատների լարված արագությունը կարող են մատնել դրանք:
Երևան բժշկական կենտրոնում Հայկ Բալայանը ղեկավարում է Ընդհանուր և լապարասկոպիկ վիրաբուժության բաժանմունքը՝ ամենածանրաբեռնվածը ողջ հիվանդանոցում: Աշխատանքի խելահեղ տեմպ… ու չես հասցնում անգամ այդ դիմակի տակ տեսնել ինքդ քեզ՝ մարդուն…
Ինչու՞ որոշեցիք բժիշկ դառնալ:
-Ես ծնվել ու մեծացել եմ բժիշկների ընտանիքում, մերն ավանդական բժիշկների ընտանիք է. ոչ միայն ծնողներս ու մեծ քույրերս, այլև քեռիս ու տատիկս են եղել վաստակավոր բժիշկներ: Ես համոզված եմ եղել, որ ուրիշ մասնագիտություն չկա ինձ համար: Ամենափոքր հասակից տեսել եմ բժշկի աշխատանքը. քեռիս Արցախյան պատերազմի տարիներին բուժծառայության հիմնադիր էր, մայրս՝ բժիշկ, հայրս՝ բժիշկ:
-Բժիշկների մեծամասնությունը ձգտում է հիմնականում դրսում շարունակել կրթությունը, Դուք սովորել եք միայն Հայաստանում, հիմա էլ դոկտորական դիսերտացիան գրում եք այստեղ, ցանկությա՞ն պակասն էր, թե՞ հնարավորության:
-Այո, դիսերտացիաս գրում եմ այստեղ՝ ՀՀ գլխավոր վիրաբույժ Հովհաննես Վազգենի Սարուխանյանի ղեկավարությամբ: Իհարկե դրսում շատ եմ կոնֆերանսների մասնակցել, շատ հոդվածներ եմ տպագրել տարբեր գիտական պարբերականներում, եղել եմ տարբեր կլինիկաներում ու տեսել վիրահատություններ, որոնք կարևոր են եղել ինձ համար: Բայց ճիշտը որ ասեմ՝ ժամանակ չեմ ունեցել. այստեղ ես այնքան զբաղված եմ եղել իմ մասնագիտության մեջ: Իսկ վիրաբուժությունն այն մասնագիտությունն է, որ լինես տեղում, թե արտասահմանում, անընդհատ անելու բան ունես:
-Ճանաչված ծնողներ ունենալու գործոնը որքանո՞վ դեր խաղաց ակտիվ աշխատանքի անցնելիս:
-Ես ավարտել եմ Երևանի բժշկական համալսարանը 2000 թվականին, բայց 1998 թվականից արդեն միշտ մասնակցել եմ վիրահատությունների 3-րդ կլինիկական հիվանդանոցում Պավել Պետրովիչ Անանիկյանի ղեկավարությամբ. 3 տարի կլինիկական արդինատուրան այնտեղ եմ անցկացրել: Ապա վերապատրաստվել եմ Մալաթիաե բժշկական կենտրոնում Արմեն Ռաֆայելի Մելիքյանի մոտ՝ էնդոսկոպիկ վիրաբուժության ուղղությամբ: Ինչ վերաբերում է ծնողներիս, ապա նրանց գործոնը չի ազդել: Ես հիմա էլ դասավանդում եմ Երևանի պետական բժշկական համալսարանում և շատ ուսանողներ ունեմ, որոնց ծնողներին չեմ ճանաչում, բայց իրենց մեծ տեղ եմ տալիս: Կարևորը՝ շատ աշխատեն, գիշեր-ցերեկ, միայն ծանոթ ունենալը շատ քիչ է: Հաճախ ազդեցիկ ծնող ունենալու հանգամանքը կարող է նույնիսկ խանգարել:
-Փորձեք վերհիշել առաջին վիրահատությունը, որն ինքնուրույն եք արել, ի՞նչ զգացողություն էր:
-Առաջին վիրահատության զգացողությունը առ այսօր էլ իմ մեջ ամենադրական էմոցիաներն է արթնացնում: Մինչ հիմա էլ առաջին վիրահատության պես անհասականալի, դրական, աստվածային էներգիայով եմ լցվում ամեն վիրահատության ժամանակ: Ինչքան էլ հոգնած լինեմ, վատ տրամադրություն ունենամ ուրիշ կենցաղային խնդիրների պատճառով, վիրահատության ժամանակ գերբնական լիցք, ուժ եմ ստանում: Կարծում եմ՝ վիրաբույժներին հատուկ է: Անքուն գիշերները, հոգնած աշխատելը մարդու ֆիզիկական վիճակի վրա ազդում են, բայց վիրահատության տված էներգիան դա կոմպենսացնում է:
-Վիրաբույժի համար վիրահատարանում ամենակարևորն ի՞նչն է:
-Հիվանդը ճիշտ ախտորոշված լինի, ճիշտ պատրաստված լինի, որ տվյալները համապատասխանեն վիրահատության ծավալին: Իհարկե խոսքն անհետաձգելի դեպքերի մասին չէ: Պետք է լինի գրագետ, բանիմաց անձնակազմ, վիրահատարանի ստերիլ պայմաններն ու տեխնիկան լինեն ժամանակակից: Մեր վիրահատարանում մենք անցյալ տարվանից ներդրել ենք նոր՝ ժամանակակից տեխնիկա, բայց դե նախկինում էլ վիրահատության որակը տեխնիկայի պատճառով չի տուժել: Պատերազմի ժամանակ էլ մոմի լույսի տակ են վիրահատել, ու դրանից վիրահատության որակը չի տուժել:
-Կառանձնացնե՞ք բնավորության 3 կարևոր գիծ, որ պետք են մարդուն, հատկապես բժիշկին:
-Ազնվություն. մարդ պիտի ազնիվ լինի և՛ իր աշխատանքում, և՛ իր հիվանդների նկատմամբ, և՛ կոլեկտիվի, և՛ընտանիքի: Աշխատասիրություն. ճիշտ է, այն քեզանից տանում է էներգիա թե՛ ֆիզիկապես, թե՛ հոգեպես, սակայն ցանկացած հաջողության հասնելու համար պիտի տաս, որ ստանաս, ու հաճույքը, որ ստանում եմ վիրահատությունների ժամանակ, հենց վերադարձող այդ էներգիան է: Սեր. սեր իմ գործի նկատմամբ, իմ ընտանիքի, իմ ծնողների: Ես շատ եմ սիրում վիրահատել, որ մի քանի օր չեմ վիրահատում, կարոտում եմ:
-Իսկ ինչպիսի՞ն է Ձեր գնահատականը՝ Հայաստանում ընդհանուր վիրաբուժության մակարդակին:
-Եթե նախկին խորհրդային մյուս պետությունների հետ մեզ համեմատենք, վատ վիճակում չենք գտնվում, բայց կաղում ենք տրանսպլանտալոգիայից՝փոխպատվաստումներից: Հաջորդ բացը ռոբոտեխնոլոգիաներն են. ամբողջ աշխարհում այն նոր է զարգանում, ու անգամ շատ զարգացած երկրներում դեռ չկա: Ինչ վերաբերում է գնահատականին. Որոշակի խավ կա, որոնց շրջանում բացակայում է վստահությունը մեր մասնագետների նկատմամբ: Շատերին գիտեմ, որ մեծ գումարներ են ծախսել ու ժամանակ՝ դրսում ախտորոշվելու և բուժվելու համար, սակայն նույն արդյունքն են ստացել, որը կարող էին այստեղ ունենալ: Հայաստանում վիրահատությունների մակարդակը բարձր է, սակայն պետք է առաջին հերթին բարձրացնել ծառայությունների մատուցման որակը՝ թեկուզ հիվանդին հենց ընդունելության սրահում դիմավորելուց սկսած: Պետք է քայլեր ձեռնարկվեն նաև բժշկի նկատմամբ հիվանդի վստահությունն էլ՛ ավելի բարձրացնելու ուղղությամբ:
-Արտահայտություն, որ պարտադիր ասում եք հիվանդին վիրահատությունից առաջ:
-Ամեն ինչ լավ կլինի:
«Երևակ» . «Առողջապահական համակարգ»
2018-04-13
Աստղիկ Բժշկական կենտրոնում իրականացվել է ցուկերկանդլի ուռուցքի բացառիկ վիրահատություն կենտրոնի Էնդոկրին վիրաբուժության ծառայության ղեկավար Արմեն Վարժապետյանի կողմից:Ֆեոքրոմոցիտոման հանդիսանում է հորմոնակտիվ ուռուցք, որը բնութագրվում է չափազանց մեծ քանակությամբ ադրենալինի և նոր ադրենալինի արտադրությամբ, ուղեկցվում է արտահայտված և դեղորայքային բուժման չենթարկվող բարձր զարկերակային ճնշումով, նյարդային համակարգի, աղե-ստամոքսային ուղու, էնդոկրին և արյան համակարգերի տարբեր խանգարումներով:Այս ուռուցքները հիմնականում(85%) զարգանում են մակերիկամներում, սակայն քիչ չեն նաև արտաերիկամային տեղակայումները, որոնցից թե բուժման, թե ախտորոշման տեսակետից առավել բարդ են այսպես կոչված՝ Ցուկերկանդլի ուռուցքները: Վերջիններս ունեն արտաորովայնամզային տեղակայություն, ուղեկցում են, կիպ հպվում են, երբեմն էլ ներ են աճում աորտային և ստորին սիներակին: Այս ուռուցքի հեռացումը կրում է վտանգներ ոչ միայն վիրահատության տեխնիկական բարդությունների, այլև վիրահատության ժամանակ և վիրահատությունից հետո զարկերակային ճնշման կտրուկ տատանումների հետևանքով՝ հնարավոր մահացու ելքի պատճառով: Կլինիկական դեպք Հիվանդը /62տ./ դիմել է «Աստղիկ» ԲԿ՝ գանգատվելով բարձր զարկերակային ճնշումից(220/120-սահմաններում), որը վերջին 6 տարիների ընթացքում ընդհանրապես չի ենթարկվել դեղորայքային բուժման: Հիվանդի մոտ նաև առկա էր շաքարային դիաբետ, և միայն ինսուլինի բարձր չափաբաժինների ներարկումները հնարավորություն էին տալիս կարգավորել գլյուկոզայի մակարդակն արյան մեջ: Բժշկական կենտրոնում կատարված կոնտրաստային ԿՏ-անգիոգրաֆիան հայտնաբերեց վերը նկարագրված Ցուկերկանդլի ուռուցքը: Վերջինիս ախտորոշումը հաստատվեց համապատասխան հորմոնային անալիզներով: Փոխանցում է Աստղիկ ԲԿ-ի կայքը: Համապատասխան մասնագիտացված նախավիրահատական պատրաստումից հետո կատարվել է ուռուցքի հեռացում՝ լապարոտոմիկ եղանակով Էնդոկրին վիրաբուժության ծառայության ղեկավար Արմեն Վարժապետյանի կողմից: Հետվիրահատական շրջանում զարկերակային ճնշումը և գլյուկոզայի մակարդակն արյան մեջ նորմալացել են համապատասխանորեն՝ առանց հակաճնշումային դեղամիջոցների և ինսուլինի:
Սիրով տեղեկացնում ենք, որ 2025 թվականի հոկտեմբերի 20-ից 24-ը Գերմանիայի Դաշնության լավագույն բարիատրիկ վիրաբույժ, Գերմանիայի Դաշնային Ազգային Ճարպակալման Գերազանցության Կենտրոնի գլխավոր մասնագետ և տնօրեն, Ֆրանկֆուրտի Համալսարանական Հիվանդանոցի վիրաբուժական ծառայոության ղեկավար պրոֆեսոր Պլամեն Ստայկովը «Աջափնյակ» Բժշկական Կենտրոնի տնօրինի հրավերքով առաջին անգամ կայցելի Երեվան, որտեղ Կենտրոնի հմուտ բարիատրիկ վիրաբուժական թիմի հետ համատեղ կկատարի մի շարք տարատեսակ բարիատրիկ վիրահատություններ։ Պրոֆեսոր Ստայկովի մասին առավել մանրամասն տեղեկատվությունը կարող եք ստանալ այս հղում։ www.prof-staikov.com 25 տարվա բարիատրիկ վիրահատությունների փորձ ունեցող պրոֆեսոր Ստայկովը տարեկան կատարում է 1000 ից ավել բարիատրիկ վիրահատություններ, եվ համարվում է ճարպակալման դեմ ուղղված վիրահատություններ կատարող բացառիկ փորձ ունեցող Եվրոպայում, որի կարծիքին հաշվի են նստում մոլորակի առաջատար Կենտրոնները։ Նա հանդիսանում է բազմաթիվ նորարությունների և գյուտերի հեղինակ, նոր միջամտական եղանակների հեղինակ, բազմաթիվ միջազգային մրցանակների դափնեկիր, նրան դիմում են նույնիկս այն բարդ դեպքերում, երբ այլ բարիատրիկ վիրաբույժներ դժվարանում են կատարել վիրահատություններ, նա հանդիսանում է ոլորտի միջազգային բացառիկ էքսպերտը։
Արթմեդ ԲՎԿ Ուրոլոգիական բաժանմունքը ակտիվորեն զբաղվում է տղամարդկանց միզասեռական օրգանների վիրաբուժական հիվանդությունների և կանանց միզային օրգանների և ուղիների հիվանդությունների արդյունավետ բուժմամբ։Այս բոլոր գանգատներից հատկապես հատուկ ուշադրության է արժանի արյունամիզությունը, որի հիմնական սկզբնաղբյուրը նորագոյացություններն են միզուղիների տարբեր հատվածներում, հետևաբար չի կարելի հետաձգել բժշկին դիմելը։ Տղամարդկանց պարագայում ուրոլոգին դիմելու անհրաժեշտություն կա, երբ առկա են հատկապես հայտնի է միզասեռական օրգանների գոյացությունների և վերականգնողական միջամտություններ պահանջող խնդիրների բուժմամբ։ Մինչև հիմա մեր բաժանմունքում կատարվում էր բաց վիրահատություններ, բայց վերջին կես տարվա ընթացքում առավել ակտիվ ներդրել ենք լապարասկոպիկ վիրաբուժությունը, որը հնարավորոթյուն է տալիս կատարել արդյունավետ վիրահատություններ քիչ տրավմատիկ եղանակով, կարճացնել հետվիրահատական շրջանը, իջեցնել հետվիրահատական բարդությունների քանակը, կանխատեսելի դարձնել արդյունքները, չունենալ արյան կորուստ։ Լապարասկոպիկ վիրահատությունները կիրառում են երիկամների, վերին միզուղիների, շագանակագեղձի և միզապարկի ուոուցքների, ինչպես նաև տարբեր վերականգողական միջամտություններ պահանջող իրավիճակների դեպքում։ Լապարասկոպիկ ժամանանակից միջամտությունները ներդնելու մեր նպատակն է ստեղծել Հայաստանում ուրոլոգիական վիրահատությունների իրականացման այն որակը, որն առկա է առաջատար երկրներոմ և հասնել նրան, որ որպեսզի ուորոլոգիական միջամտություննների կարիք ունեցող պացիենտները մի քանի անգամ ավելի մատչելի գներով Հայաստանում ստանան նույն արդյունքները, ինչը որ ստանում են արտերկրում։ Այս բաժանմունքում օնկոուրոլոգիական հիվանդություններով դիմող պացիենտները ստանում են բարձրակարգ բժշկական օգնություն, երկարացնում կյանքի տևողությունը, ձգալիորեն բարելավում կյանքի որակը «Արթմեդ» ԲՎԿ ուրոլոգիական բաժանմունքումը հայտնի է նաև միզասեռական օրգանների տարբեր պաթոլոգիաների ժամանակ պահանջվող բացառիկ ռեկոնստրուկտիվ պլաստիկ միջամտություններով, այդ թվում ուրետրոպլաստիկա և միզապարկ-հեշտոցային,միզածորան-հեշտոցային խուղակների պլաստիկա այտի լորձաթաղանթի հյուսվածքներով: Դրանք ժամանակակից ու բարդ միջամտություններ են, որոնք պահանջում են կատարողական բարձր տեխնիկա ու վիրաբուժական հմտություն, որը լիարժեք առկա «Արթմեդի» ուրոլոգիական բաժանմունքում:
Աճուկային ճողվածք առաջանում է, երբ որեւէ օրգան մտնում է ճողվածքի մեջ, սեղմվում է եւ չի սնուցվում:Տղաների մոտ հիմանականում օղակվում են բարակ աղիքի գալարները, աղջիկների մոտ արգանդափողը՝ ձվարանի հետ: Դա կարող է պատահել ներորովայնային ճնշման ցանկացած դեպքում ՝ բարձր ճչոց, փորկապություն, հազ և այլն:Վիրահատությունը ուշացնել պետք չէ, հակառակ դեպքում անհրաժեշտություն է առաջանում հեռացնել օղակված օրգանը կամ տվյալ հատվածը:Արաբկիր բժշկական կենտրոնի Ուրո-վիրաբուժական բաժանմունքում աճուկային ճողվածքի վիրահատության տևողությունը չի գերազանցում 15 -20 րոպեն, սակայն բարդացումների դեպքում վիրահատությունը լինում է երկու- երեք ժամ: Ալբերտ Լալազարյան
Եթե ձեր ականջը ցավում է լողավազանից կամ ծովում լողալուց հետո, ապա այդ ցավը պետք չէ անտեսել։ Ամենայն հավանականությամբ, ջուրն ականջից ներս է թափանցել և բորբոքային պրոցես առաջացրել։ Երեխաների մոտ խնդիրն ավելի հաճախ է առաջանում, քանի նրանց լսողական անցուղիները պատող մաշկը բարակ են և խոցելի վարակների նկատմամբ: Եթե ականջի մեջ ջուր է անցնում, այն նոսրացնում է ծծումբը և տեղի է ունենում դրա ուռչում։ Սա բարենպաստ պայմաններ է ստեղծում ներս ներթափանցած վարակի ակտիվորեն զարգացման համար և հրահրում է բորբոքային պրոցեսներ։ Այս դեպքում մարդուն միաժամանակ անհանգստացնում է ականջի ցավը, խցանվածությունը և ուժեղ քորը։ Այս բոլոր ախտանիշները վկայում են միջին ականջի բորբոքման մասին: Այն կարող է լինել արտաքին, որը հաճախ կոչվում է «լողորդի ականջ», կամ միջին՝ երբ մրսածության պարագայում քթից կամ կոկորդից վարակը անցնում է միջին ականջ։ Ինչպե՞ս դուրս բերել ջուրն ականջից Գլուխը թեքեք դեպի ուսը և նրբորեն քաշեք ձեր ականջի բլթակը Չորացրեք ականջը սրբիչով։ Կարևոր. մի փորձեք չորացնել ականջը բամբակյա փայտիկներով կամ լուցկիներով, որոնք փաթաթված են բամբակով: Այսպիսով, դուք միայն կվատացնեք այն՝ ուռած ծծումբը ներս կմղեք, կվնասեք լսողական անցուղիները։Եթե չի ստացվում հեռացնել ջուրը, անհրաժեշտ է դիմել ԼՕՌ բժշկի:Քիթ-կոկորդ-ականջաբան, բ․գ․թ․, դոցենտ Արմեն Վլադիմիրի Հայրապետյան
