«iPLAST». Ինչպես սիրիահայ գործարարը գրավեց պլաստիրների շուկան

Արդեն հինգ տարի է` Սիրիայից հայրենիք վերադարձած Հարութ Գասպարը զբաղվում է պլաստիրների արտադրությամբ: «iPLAST» պլաստիրներ արտադրող ընկերության հիմնադիր տնօրենը 2001-2007 թթ.-ին սովորել է Մ. Հերացու անվան պետական բժշկական համալսարանում: Ուսումն ավարտելուց հետո Սիրիայից ներմուծում էր պլաստիրներ, իսկ երբ ճանապարհները փակվեցին, ի հայտ եկան խնդիրներ՝ կապված ներմուծման հետ: Երիտասարդ դեղագետ-գործարարը որոշեց, որ պետք է կանգ չառնի ու շարունակի իր գործունեությունը՝ այս անգամ արդեն որպես արտադրող: Մեկնեց Չինաստան ու վերադարձավ համապատասխան սարքավորումներով և հումքով՝ հիմնելով իր սեփական արտադրամասը:

Ընկերության արտադրանքը կարելի է բաժանել երկու խմբի՝ պլաստիրներ, որոնք նախատեսված են ամենօրյա օգտագործման համար և վիրահատական երիզներ, որոնք հիմնականում բժշկական օգտագործման համար են: Դրանք  նախատեսված են հետվիրահատական վերքերի վիրակապերի համար:  Վիրահատական պլաստիրները բամբակյա են և մետաքսե:  «iPLAST»-ը, շնորհիվ արտադրանքի բարձր որակական հատկանիշների և միջազգային ստանդարտներին համապատասխան լինելուն, գտավ իր սպառողին: «iPLAST»-ին վստահում են բազմաթիվ  բժիշկներ և հիվանդանոցներ: Այն համագործակցում է քաղաքի լավագույն դեղատների և կլինիկաների հետ: Սակայն նման արդյունքի գործարարը միանգամից չի հասել.  «Եթե ունենաս կամք, կազմակերպվածություն և նպատակ, ամեն ինչ հնարավոր է: Այս ընթացքում ես ոչ մի ճնշման չեմ հանդիպել, իհարկե եղել են խնդիրներ, բայց դրանք հաղթահարվել են»:

Գործարարի կարծիքով հայ արտադրողի համար համապատասխան միջավայր չկա, անհարմարությունները շատ են, բայց դա էլ ժամանակի հարց է: Իհարկե կցանկանար, որ ներմուծողի և արտադրողի համար տարբեր մոտեցումներ լինեին, որովհետև արտադրողի ծախսերն ավելի շատ են: Այդուհանդերձ, Հարութ Գասպարն ունի պրոֆեսիոնալ աշխատակազմ, որտեղ յուրաքանչյուրն իր գործի գիտակն է: Աշխատակազմում հիմնականում ընգրկված են իր ընտանիքի անդամները: «Մեր ընկերությունը հիմնադրվեց 2013 թվականին, անվանումն առաջարկեց եղբայրս, որը հապավում է International plaster-ից»,-նշումէ Հարութ Գասպարը: Ի դեպ, ընկերությունն աշխատում է միջազգային շուկա դուրս գալու ուղղությամբ: «Մեր խնդիրն է լինել ոչ թե առաջատարներից մեկը, այլ առաջատարը մեր տարածաշրջանում: Առաջիկայում պլաստիրները կհայտվեն վրացական շուկայում, ինչպես նաեւ ՌԴ-ում և Միջին Արևելքում»:

Նման իրավիճակում ի հայտ է գալիս նաև մրցակցություն, սակայն գործարարի խոսքով իրենք խնդիր չունեն: «Ես վստահ եմ մեր  արտադրանքի որակի վրա: Սակայն իսկական մրցակցություն կսկսվի, երբ սկսենք արտադրել նաև կպչուն սպեղանիներ՝«santavik»-ներ: Դրանք արդեն հուլիս ամսվանից վաճառքի կհանվեն, դրանք իրենց որակով և անհամեմատ ցածր գնով մրցակցությունից դուս կմղեն շուկայում առկա թուրքական կպչուն սպեղանիները»,-վստահ է արտադրողը:

«iPLAST. հայկական գերազանցություն» պլաստիրների շուկայում

Armenian Excellence կամ «հայկական գերազանցություն» նշանաբանի ներքո  հանդես եկող ընկերությունն ամեն ինչ անում է, որպեսզի իր սպառողը ոչ միայն գոհ մնա, այլև հարկ եղած դեպքում նորից նախապատվությունը տա հենց «iPLAST»-ին: «Սկզբում մարդիկ գնում էին մեր պլաստիրները, որովհետև հայկական արտադրանք էր, իսկ հետո արդեն նաև որակի համար»,-ասում է գործարարը: Այս պլաստիրների հումքն ու արտադրման եղանակն ամբողջովին համապատասխանում է ամերիկյան հայտնի «3M»-ին, որը լավագույններից է այս ոլորտում: Պլաստիրների հիմնական հումքը ներմուծվում է Չինաստանից, իսկ երկրորդականը ձեռք է բերվում Հայաստանում. դա պլաստմասն է և կարտոնը:

Բացի որակից ընկերությունը հոգ է տարել նաև պլաստիրների հարմարավետ դիզայնի մասին: 5 մետր երկարություն, հարմարավետ ու գունավոր տուփ, մտածված դիզայն: Տնօրենի խոսքով, իրենք մտածել են ոչ միայն որակի, այլև՝ դիզայնի մասին՝ ցանկանալով այն դարձնել ավելի հարմարավետ, որովհետև ոչ առողջ մարդուն կարող է նյարդայնացնել նույնիսկ ամենաչնչին բանը:

 «iPLAST»-ի գործունեությանը կարող եք հետևել նաև համացանցում՝ http://www.iplast-llc.com/պաշտոնական կայքում: