Ճիշտ և արդյունավետ մարզումներ

Վերջին տարիներին Երևանում մարզասրահների քանակն ավելացել է։ Գուցե կարելի է ենթադրել, որ մարդիկ սկսել են քիչ թե շատ ուշադրություն դարձնել իրենց առողջությանն ու փոխել կենսակերպը։ Մարզման առանձնահատկությունների և դրանց նկատմամբ հայերի վերաբերմունքի մասին զրուցել ենք «DDD» մարզասրահի մարզիչ Արշակ Բաբայանի հետ։

-Ի՞նչ փոփոխություններ եք նկատում առողջ ապրելակերպի նկատմամբ մարդկանց վերաբերմունքի մեջ։

-Մարդիկ կամաց-կամաց սկսում են այլ խնդիրներից զատ ուշադրություն դարձնել նաև իրենց առողջությանը։ Հիմա գրեթե բոլորը ցանկություն ունեն մարզվելու, չնայած որ դեռ քչերի ֆինանսական հնարավորություններն են թույլ տալիս օգտվել մարզասրահներից։ Այժմ մարդիկ շատ են ճամփորդում, տեսնելով հատկապես եվրոպացիների ապրելակերպը՝ փորձում են նմանվել, հիմա մեծ ուշադրություն են սկսել դարձնել իրենց կազմվածքին, ցանկանում են գեղեցիկ ու մարզված տեսք ունենալ։

-Կան մարդիկ, որոնք մարզումները համարում են ֆիզիկական ավելորդ ծանրաբեռնվածություն, ի՞նչ կասեք այս մասին։

-Դա ծուլության նշան եմ համարում: Եթե մեկ անգամ մարզասրահ հաճախեն, կփոխեն վերաբերմունքը։ Մարզիչները պետք է կարողանան մարդկանց մեջ սերմանել այն գիտակցությունը, որ դա առաջին հերթին առողջության համար է։ Բացի մարզասարքերի վրա մարզվելուց կարելի է զբաղվել յոգայով, պիլատեսով, ինչ-որ մարզաձևով կամ պարով, միայն թե պետք է անել դա հաճույքով, և դու լրացուցիչ ուժ և էներգիա կստանաս՝ իհարկե նաև պահպանելով առողջությունդ։

-Իսկ մեծ մասամբ տարվա որքա՞ն ժամանակն են հատկացնում մարզումներին։

-Քչերն են Հայաստանում ամբողջ տարվա ընթացքում մարզվում։ Հիմնականում մարզվելու գալիս են ամռանը՝հատկապես ծով գնալուց առաջ, և ձմռանը՝ ամանորյա տոներից հետո, երբ հարկ է լինում ազատվել հավաքած ավելորդ կիլոգրամներից։

-Ո՞րն է ամենաճիշտ և արդյունավետ գրաֆիկը մարզվելու համար։

-Իմ կարծիքով պետք է մարզվել ամենաքիչը տարվա 8 ամիսը։ Ամենաճիշտը շաբաթական 3 անգամյա առավոտյան մարզումներն են, սակայն եթե հարմար չի լինում հաճախորդներին, մենք մշակում ենք այնպիսի օրակարգ, որով կկարողանանք առավելագույն արդյունքը ստանալ։ Ինչ-ինչ պատճառներով մարզումները դադարեցնելու դեպքում, իհարկե եթե վնասվածքների պատճառով չէ, պետք է գոնե առավոտյան վազել, ինչ-որ վարժություններ անել, որպեսզի հնարավորինս պահպանվի մարզավիճակը։

-Առողջ ապրելակերպը բացի մարզումներից ենթադրում է նաև սննդի ճիշտ օգտագործում և քնի ռեժիմի պահպանում, որպես մարզիչ՝ ի՞նչ ուշադրություն եք դարձնում սրանց վրա։

- Արդյունքի չենք կարող հասնել առանց սրանք հաշվի առնելու, հատկապես գիտենք, որ հայերը սնվում են յուղոտ,  կալորիապես հարուստ սննդով։ Ամեն մեկի համար մշակվում է առանձին սննդակարգ։ Մարզումներից առաջ սնունդ պետք է ընդունել մոտավորապես 1ժամառաջ, ըստ սննդակարգի՝ ոչ մեծ չափաբաժնով։ Քունը ևս կարևոր է, չենք կարող արյունավետ պարապունք անցկացնել, եթե մարդը հոգնած է։

- Հոգեբանական ի՞նչ ազդեցություն կարող են ունենալ մարզումները։

-Կան մարդիկ, որ մարզասրահ հաճախելուց հետո հրաժարվում են վատ սովորություններից, թողնում են ծխելը, հրաժարվում են ալկոհոլից։ Ցանկալի արդյունքի հասնելուց հետո ավելանում է վստահությունը սեփական ուժերի նկատմամբ, փոխվում է վերաբերմունքը նաև սեփական մարմնի նկատմամբ։ Մարզումներից հետո լիցքաթափվում են, ազատվում սթրեսից, բարձրանում է աշխատունակությունը։